Téng tilu di tangsi pulisi
Janté lilir katilu kali
Ngajambak meles buuk handapeunana
Téng lima di tangsi
Hianat randa gigireunana
Janté lilir kabaribinan
Geblig léngkah sakuriling imah
Janté ditingker, taya jalan geusan ingkah
Panangtang wadana:
’Janté, hudang!
Urang datang males pati!’
’Sing saha jago, asup!
Mun geus bosen nya hirup!’
’Mana ari Janté nu gagah?
Geuning teu wani bijil ti imah?’
’Badan andika palapah gedang leungeun kula lalancip gobang!’
Nembus kaca Janté nangtung dina wuwung
Ngabendéng nyérangkeun nu ngepung
Janté sidakep bari ngiceup
’He balaréa,
Na Janté aya di mana?’
Tinglalieuk jalma nu ngarepung
Sora Janté handapeun tanjung
’Udag mangkelukna minggat!’