Ngahéphép sapanglalajoan
Neuteup ka Janté nu matana ngembang wéra
’Ku naon neuteup ka kula?
Teruskeun ngibing, peuting nyérélék béak!’
Ramé deui kalangan, ramé deui pangaduan
Janté masih ngibing nyolémpang saléndang
Nguyup arak sloki kasalapanlikur
Waktu beurang datang, Janté ngagolér
Diburu ku mantri pulisi:
’Janté, Janté Arkidam, Nusa Kambangan!’
Ngagisik mata hayang sidik
Janté mencrong mantri pulisi:
’Ki Mantri, tindakan anjeun léléwa bikang
Ngabokong jalma keur tibra!’
Arkidam ditalikung leungeunna dua
Sorot matana ngentab seuneuan
Saméméh béak poé kahiji
Janté minggat nitih cahya
Kaluar ti panjara
Saméméh cunduk peuting kahiji
Mantri pulisi nyungseb di dasar walungan
Teu nyawaan
’Saha jago nu nungtut béla?
Datang mun kaula nyaring!’
Susumbarna ngumandang di beuteung peuting
Janté ngabedega di sasakgantung
Taya saurang jalma nu datang
Janté nguncud neuleuman jempling
Randa maésan tadi beurang
Ka imahna Janté datang
Wanita mana nu teu taluk ka manéhna?
Simbar dada hideung galing
Biwir amis jeruk garut
Létah madu kalapa puan
Kumis reuseuk sapu injuk
Arkidam, Janté Arkidam